Шығыс Қазақстан облысында қауіпсіздік саласында жасанды интеллект белсенді қолданыла бастады. Оның көмегімен бейнебақылау деректері талданып, қоғамдық көліктің жұмысы оңтайландырылады. Бұл туралы өңірлік коммуникациялар қызметінде өткен брифингте облыстың цифрландыру және архивтер басқармасы басшысының орынбасары Арнұр Сапарғалиев мәлім етті, деп хабарлайды F16.kz.
Бүгінде Өскемен, Риддер және Алтай қалаларында 5 839 бейнебақылау камерасы орнатылып, олар облыс әкімі аппаратының ведомствоаралық орталығы мен полицияның жедел басқару орталығына біріктірілген. Қосымша 243 «Мерген» аппараттық-бағдарламалық кешені енгізілді, олар жол және қоғамдық қауіпсіздікті қамтамасыз етеді.
Сондай-ақ 109 және 112 бірыңғай байланыс орталықтары халықтың өтініштерін цифрлық шешімдер арқылы өңдейді. Тек қазан айының өзінде 6 мыңнан астам өтініш түскен. Жыл басынан бері операторлар ондаған мың қоңырауға жауап беріп, тұрғындардың күнделікті мәселелерін шешуге көмектесті, – деді Арнұр Сапарғалиев.
Аймақ басшылығы телекоммуникацияны, қауіпсіздік жүйелерін, «ақылды» басқаруды және IT-жобаларды белсенді түрде дамытып келеді. Бірыңғай цифрлық экожүйеге көшу – муниципалдық деңгейден бастап облыстық деңгейге дейінгі барлық процестердің ашықтығын, тиімділігін және инновациялық дамуын қамтамасыз етеді.
