Шығыс Қазақстан облысында қадағалаушы орган өкілдері тұтынушылар құқығын қорғады. Ұлан ауданының прокуратурасы жүргізген тексеру барысында жылу, су және кәріз қызметтерін көрсетуге қатысты келісімшарттардың қолданыстағы талаптарға сай келмейтіні белгілі болды, деп хабарлайды F16.kz.
Атап айтқанда, «Молодежный» және «Коммунальник» коммуналдық кәсіпорындары тарапынан жасалған шарттар «Табиғи монополиялар туралы» заң талаптарына сай болмай шыққан. Құжаттарда міндетті тармақтар көрсетілмеген және қызмет көрсетуші ұйымдардың халық алдындағы жауапкершілігі нақты айқындалмаған. Сонымен қатар коммуналдық төлемдерді қайта есептеу тетіктері формалды сипатта болған.
Аталған заң бұзу жағдайы ауданның 7 мыңнан астам тұрғыны мен 231 кәсіпкерлік субъектісінің мүддесіне кері әсер еткен.
Прокурорлық қадағалау актісі негізінде тұтынушылардың құқығы толық қалпына келтіріліп, келісімшарттар қолданыстағы заңнамаға сәйкестендірілді.
Заң талаптарын бұзғаны үшін аталған коммуналдық кәсіпорындарға қатысты әкімшілік іс қозғалып, 2 миллион теңгеден астам айыппұл салынды.
