Шығыс Қазақстан облысында аңшылар мен балықшыларға арналған туристік фестиваль өтті, деп хабарлайды F16.kz.
Ауқымды шараға тек өңір тұрғындары емес, еліміздің түкпір-түкпірінен, атап айтқанда Астана, Алматы, Шымкент, Ақтау, Орал, Ақтөбе, Қызылорда және Атырау қаласынан қонақтар арнайы келген.
Қатысушыларды облыс әкімі Нұрымбет Сақтағанов құттықтап, мұндай фестивальдар табиғатқа деген жанашырлықтың және азаматтық жауапкершіліктің айқын көрінісі екенін атап өтті.
2012 жылы құрылған аңшылар қауымдастығы бүгінде жарты миллионнан астам қатысушының басын қосып отыр. Қызығушылық танытқандар қатары жыл санап артып келеді. Қауымдастық браконьерлікпен күрестен бастап, жастарды экологиялық тәрбиелеуге дейін маңызды мәселелерді шешуге белсене араласады, — дейді ұйымдастырушылар.
Фестиваль бағдарламасы Алтай, Күршім және Катонқарағай аудандарын қамтыды. Қатысушылар аймақтың көркем табиғатына тамсанып қана қоймай, Шығыс Қазақстан халқының мәдениетімен, тарихымен және қонақжайлығымен де танысты.
Фестиваль табиғатты қорғау, экотуризмді дамыту мәселелерін талқылауға және тәжірибе алмасуға арналған алаңға айналды. Қатысушылар мұндай іс-шараны дәстүрге айналдыруды ұсынды.
