Өскеменде Бұқаралық ақпарат құралдары қызметкерлері күніне арналған салтанатты шара өтіп, журналистика саласының үздіктері марапатталды. Мерекелік жиынға Шығыс Қазақстан облысының әкімі Нұрымбет Сақтағанов қатысты.
Өңір басшысы БАҚ өкілдерін кәсіби мерекемен құттықтап, олардың қоғамдағы маңызды рөліне тоқталды.
– Сіздер күн сайын ел өміріндегі маңызды оқиғаларды халыққа жеткізіп, ақиқаттың ақ жолында аянбай еңбек етіп келесіздер. Мемлекет басшысы Қасым-Жомарт Кемелұлы Тоқаев БАҚ-тың қоғамдағы рөлін айрықша атап өтіп, «Елімізге шынайы ақпарат тарататын, халықтың мұң-мұқтажын жеткізетін, елдік мүддені жоғары қоятын кәсіби журналистика қажет» деген болатын. Шығыс Қазақстанның жетістіктерін, нағыз еңбек адамдарының ерлігін, өңірдегі оң өзгерістерді насихаттауда өздеріңіздің үлестеріңіз ерекше. Осы жолда кәсіби шеберлік танытып, қоғамдағы өзекті мәселелерді көтеріп, ел игілігі үшін қызмет етіп жүрген барша журналистерге шынайы алғысымды білдіремін! Мереке құтты болсын! – деді Нұрымбет Сақтағанов.
Салтанатты рәсімде журналистика саласында ұзақ жылдар бойы жемісті еңбек еткен мамандар мемлекеттік және ведомстволық наградалармен марапатталды.
Қазақстан Республикасы Президентінің Жарлығымен ардагер журналист Айтмұхамбет Қасымов «Құрмет» орденімен, «Хабар» агенттігінің телеоператоры Дмитрий Пыхтин «Ерен еңбегі үшін» медалімен наградталды. Сонымен қатар бірқатар БАҚ қызметкерлеріне Мәдениет және ақпарат министрлігінің «Еңбек ардагері», «Ақпарат саласының үздігі» төсбелгілері, Құрмет грамоталары мен Алғыс хаттары табыс етілді. Әртүрлі номинациялар бойынша үздік танылған журналистер мен операторларға облыс әкімінің арнайы сыйлығы берілді.
Мерекелік шараның ең маңызды сәттерінің бірі – тұрғын үй мен қызметтік көлік кілттерін табыстау болды.
Президент атынан «Qazaqstan» телеарнасының Шығыс Қазақстан облысындағы меншікті тілшісі Олжас Керейханға үш бөлмелі пәтердің, ал «ALTAI-NEWS» ЖШС медиа орталығының журналисі Айдос Мырзахметовке екі бөлмелі пәтердің кілті тапсырылды.
Сондай-ақ жаңа қызметтік автокөліктер «ALTAI» телеарнасына, «ALTAI-NEWS» медиа орталығына және Шығыс Қазақстан облысының Өңірлік коммуникациялар қызметіне берілді.
Мерекелік іс-шара концерттік бағдарламамен қорытындыланды.
