Ойын бизнесін заңсыз ұйымдастырып, жеті жыл бойы халықаралық іздеуде жүрген күдікті Түркия Республикасынан экстрадицияланды, деп хабарлайды F16.kz.
Тергеу мәліметтері бойынша, күдікті 2015–2016 жылдары Шығыс Қазақстан облысының мемлекеттік органдарының бірінде басшылық қызметті атқарған. Сол жылдары ойын бизнесі саласындағы заңсыз әрекеттері үшін жүйелі түрде ақшалай сыйақы алып отырған.
Қазақстан Республикасының Бас прокуратурасы мен Ішкі істер министрлігі Интерполының қызметкерлері Сыртқы істер министрлігінің көмегімен Қазақстан азаматын трансұлттық ұйымдасқан қылмыстық топқа қатысқаны, ойын бизнесін заңсыз ұйымдастырғаны және билігін асыра пайдаланғаны үшін қылмыстық жауаптылыққа тарту мақсатында Түркия Республикасынан экстрадициялады, — дейді ҚР Бас прокуратурасы.
Қазіргі уақытта ол тергеу изоляторына қамалды.
Айта кету керек, қылмыстық топтың басқа мүшелері бұған дейін түрлі мерзімге бас бостандығынан айырылған.
Ал, күдіктіге айыпталған іс-әрекеттері үшін қылмыстық заңнама бойынша мүлкі тәркіленіп, 12 жылдан 20 жылға дейінгі мерзімге бас бостандығынан айыру түріндегі жаза қарастырылған, — делінген хабарламада.
Қазақстан Республикасының Бас прокуратурасы шетелде сыбайлас жемқорлық және экономикалық қылмыстар жасағаны үшін жасырынып жүрген адамдарды анықтау, іздестіру және жауаптылыққа тарту жөніндегі жұмысты әлі де жалғастырады.
