Шығыс Қазақстан облысында полиция қызметкерлері біреудің көлігін заңсыз айдап кеткен азаматты қолға түсірді, деп хабарлайды F16.kz.
ШҚО полиция департаментінің мәліметінше, оқиға 5 қаңтар күні сағат 18.55-те тіркелген. Қала тұрғыны «102» арнасына хабарласып, өзіне тиесілі BMW маркалы автокөлікті белгісіз біреу заңсыз айдап әкеткенін айтқан. Құқық бұзушылық салдарынан жәбірленушіге шамамен 2 миллион теңге көлемінде материалдық шығын келтірілген.
Жедел іздестіру шаралары барысында ШҚО ПД жедел басқару орталығының бейнебақылау инспекторлары мен патрульдік полиция батальонының қызметкерлері бірлесіп, іздеудегі автокөлікті Өскемен-Алтай жолының 38-шақырымында тоқтатты. Көлік тізгінінде бұрын сотталған 31 жастағы азамат болған.
Аталған дерек бойынша сотқа дейінгі тергеу амалдары басталды. Күдікті әрі қарай процессуалдық іс-қимылдар жүргізу үшін Өскемен қалалық полиция басқармасына жеткізілді.
Полиция қызметкерлері автокөлік ұрлығы мен заңсыз айдап кету деректерінің алдын алу мақсатында азаматтарға кілтті салонда қалдырмауға, есікті ашық тастап кетпеуге кеңес береді. Сонымен қатар автокөлікті бейнебақылау камералары орнатылған орындарға қоюды және қосымша қорғаныс құралдарын пайдалануды ұсынады.
