Шығыс Қазақстан облысында кәсіпкерге заңсыз талап қойған екі лауазымды тұлға жауапқа тартылды. Бұл туралы облыс прокуратурасы мәлім етті, деп хабарлайды F16kz.
Жыл басынан бері прокурорлық шаралар нәтижесінде 1266 кәсіпкердің құқығы қорғалып, 11 инвесторға қолдау көрсетілді. Бизнеске қатысты екі мәселе шешімін тапты. Кәсіпкерлік қызметке заңсыз араласқаны үшін Әкімшілік құқық бұзушылық туралы кодекстің 173-бабымен екі лауазымды тұлға жауапқа тартылды, — деп хабарлады облыс прокуратурасы.
Облыс прокуратурасының мәліметінше, «Алтайская Форель» ЖШС-ға балық тасымалдау үшін қажетті ветеринарлық анықтама бірнеше рет берілмеген. Бұған себеп заңнамада көрсетілмеген, балықтың шығу тегі туралы құжатты талап ету болған. Соның салдарынан кәсіпорын жұмысы тоқтап қалған. Прокуратураның араласуынан кейін кәсіпкердің құқығы қалпына келтіріліп, анықтама берілді.
