Өскемен жоғары политехникалық колледжі – білікті мамандар тәрбиелеп жатқан өңірдегі жетекші оқу орындарының бірі. Елімізде жаряиланған Жұмысшы мамандықтар жылы аясында БАҚ өкілдері бүгін аталмыш білім ордасына барып, жұмыс барысымен, заманауи зертхана және шеберханаларымен танысты, деп хабарлайды F16.kz.
Қазіргі күні колледжде IT-орталық, электроника, мехатроника зертханалары (FESTO базасында), жылу техникасы, баламалы энергетика, жүз ангар үлгісіндегі оқу полигоны, сондай-ақ биіктік жұмыстарына арналған оқу полигоны жұмыс істеп тұр. Студенттер WorldSkills халықаралық стандарттары бойынша жабдықталған орталықта тәжірибе жинақтауға мүмкіндік алады.
Студенттер мұнда тек теориялық білім алып шықпайды. Біз жұмысқа кірген күннен бастап станокты, өндірістегі басқару тақтасын іске қосатын немесе жасанды интеллект алгоритмдерін автоматтандыру жүйесін еркін меңгерген білікті маман даярлап шығамыз, — дейді колледж директоры Исатай Исин.
Колледждегі жас түлектер ерекше қызығушылық танытатын мамандықтардың бірі — «Ұшқышсыз ұшу аппараттарына қызмет көрсету». Мұнда білім алушылар ауылшаруашылық жерлерін гербицидтермен және пестицидтермен автономды түрде өңдеуге қабілетті, белсенді заттардың шығынын едәуір төмендететін және аграрлық процестердің тиімділігін арттыратын агроөнеркәсіптік дрондармен жұмыс істейді.
Бұл қарапайым дрон емес, аграрлық сектордың цифрлық трансформациясының бір бөлігі. Біздің студенттер екінші курста маршруттарды бағдарламалауды, ЖИ-басқару жүйелерін бейімдеуді және агродеректерді нақты уақытта талдауды үйрене бастайды, — деп түсіндірді өндірістік оқыту шебері Виталий Тихонов.
Білім ордасы өңірдегі ірі кәсіпорындармен ынтымақтастық орнатқан. Студенттер «Казцинк», «Өскемен ЖЭО», «Силумин-Восток», «ҮМЗ» сынды кәсіпорындарда бірінші курстан бастап тәжірибеден өтеді.
