Шығысқазақстандықтар биыл домбыра күнін ерекше атап өтеді, деп хабарлайды F16.kz.
Елімізде шілде айының алғашқы жексенбісінде Ұлттық домбыра күні аталып өтеді. Биыл бұл мереке 6 шілдеге дәл келеді. Бірақ Шығыста домбыра күні 3 шілдеде басталып кетті.
Өскемен қаласында ТМД елдерінің танымал дирижерлері мен Байжігіт атындағы қазақ халық аспаптары оркестрінің қатысуымен халықаралық дирижерлер форумы өтіп жатыр.
Мұндай ауқымды шара өңірде алғаш рет өткізіп жатырмыз. Еліміздің түкпір-түкпірінен ғана емес, көршілес елдерден де танымал дирижерлар келіп, өз өнеріп көпшілікке паш етпек. Кеше әр ауданның дирижерларына шеберлік сабақтар өткізілді, бүгін қала тұрғындары мен қонақтарына арналған гала-концерт болады, — деді ШҚО мәдениет басқармасының басшысы Самат Қасенов.
Шара 6 шілде күні Жамбыл атындағы саябақ пен Арбатта жалғасады. Алдымен жерлігілікті үздік күйшілердің күй тартысы ұйымдастырылып, артынша қала тұрғындары кәсіби музыканттармен бірге күй орындауға мүмкіндік алады.
Әрине мемлекеттің дамуында әр саланың өзіндік маңызы бар. Бірақ өнердің орны ерекше екенін мойындау керек. Елдің аты спорт пен өнер арқылы әлемге танылады. Сондықтан өз өнерімізді, ұлттық дәстүрлерімізді өлтіріп алмай, дәріптеу маңызды. Осы орайда домбыра күніне орай осындай ауқымды форум өткізіп жатқан Шығыс Қазақстанға алғысым шексіз, — деді Қырғыз Республикасының халық әртісі, Қырғызстан Республикасы Мемлекеттік сыйлығының лауреаты, профессор Бақтыбек Тилегенов.
Облыс мәдениет басқармасының басшылары бұл шара алдағы уақытта да жалғасын табатынын жеткізді.
