Төтенше жағдай Глубокое ауданының Черемшанка ауылындағы жеке тұрғын үйде болған, деп хабарлайды F16.kz.
Өрт шыққан кезде үй ішінде төрт бала болған, олардың анасы жұмыста жүрген. 2012 жылы және 2019 жылы туған ересектеу балалар тысқа шығып, көршілерден көмек сұраған. Осы сәтте көшеде кетіп бара жатқан жергілікті тұрғын Дмитрий Недозрелов дереу көмекке ұмтылған. Ол отқа оранған үйден 2021 жылы және 2023 жылы туған екі сәбиді сыртқа алып шықты.
Өрт сөндірушілер жедел жетіп, 45 шаршы метр аумақты шарпыған өртті сөндірді. Балалар медициналық мекемеге жеткізілді. Өрттің себебі анықталып жатыр, – деп хабарлады ШҚО ТЖД баспасөз қызметі.
Ведомствоның хабарлауынша, Дмитрий Недозрелов бульдозер жүргізушісі болып жұмыс істейді.
Қазір, әлеуметтік желілерде зардап шеккендерге көмек жинау басталып кетті.
Көршілердің айтуынша, өртенген үйдің иесі әйел адам балаларын жалғыз өзі тәрбиелеп отыр. Сол себепті оларды үйде жалғыз қалдырып, жұмыс істеуге мәжбүр болған.
