ШҚО-да жыл басынан бері 700-ден астам интернет алаяқтық фактілері тіркелген. Бұл көрсеткіш өткен жылдың осы кезеңімен салыстырғанда едәуір артқан. Бұл туралы ШҚО ПД ҚТЖК ІІО бойынша Аға жедел уәкіл, полиция майоры Рауан Дулатұлы айтты, деп хабарлайды F16.kz.
Қазіргі күні Қазақстанда ғана емес, әлем елдерінде интернеттегі алаяқтарға тыйым болмай тұр. Ғаламтор мен әлеуметтік желі қарыштап дамыған сайын алаяқтардың айласы да сан түрлеріп, құрығына түсетіндер саны артып келеді.
Тәртіп сақшыларының айтуынша, алаяқтар адамның жеке деректерін қолға түсіргенше түрлі сылтауларды пайдаланып, бір схемада жұмыс істейді.
Бізге шағымданғандардың көпшілігі бір схеманы айтады. Алаяқтар өзін банк қызметкері ретінде таныстырып, телефонға код жібереді. Ал, көбіне зейнет жасындағы тұрғындар құпия сөзді оған айту арқылы барлық деректерін береді, осылайша атынан несие рәсімдеп немесе шотындағы ақшаны шешіп ала алады, — деді ол.
Сондай-ақ құқық қорғау органы өкілі ретінде хабарласу, зиянды сілтемелер арқылы мессенджерді бұзып иемдену фактілер тіркелген.
Тәртіп сақшылары тарапынан тұрғындарды ақпараттандыру және қылмыстың алдын алу мақсатында түрлі профилактикалық шаралар ұйымдастырылады. Десе де, алаяқтың құрығына түскендер саны артпаса, азаймай тұрған көрінеді.
Жыл басынан бері 700-ден астам факті тіркеліп, 60-тан астам қылмыс ашылды. Бұл өткен жылғы көрсеткішпен салыстырғанда әлдеқайда көп. Бірақ, ескере кететін жайт, көбіне алаяқтың арбауын түскенге ұялып, шағымданбайтындар мен арада біраз уақыт, 1-2 жыл өтіп кеткеннен кейін шағым түсіретіндер де бар, — дейді полиция майоры.
Осы орайда құқық қорғау органының өкілдері алданған жағдайда бірден полицияға шағымдану керектігін, ол қылмысты азайтуға септігін тигізетінін атап өтті.
