Былтыр Шығыс Қазақстан облысында табиғи өсім 15,6%-ға төмендеді. Бұл туралы облыстық денсаулық сақтау басқармасы басшысының орынбасары Айнаш Капанова мәлім етті, деп хабарлайды F16.kz.
Басқарма басшысының айтуынша, өңірде сәбилердің дүниеге келуі де бәсеңдеген. Биылғы бірінші тоқсанда бұл көрсеткіш былтырғы сәйкес кезеңімен салыстырғанда 18,2%-ға кеміген.
Қазір Шығыс Қазақстан облысында 724 мың адам тіркелген. Оның 638 мыңы – ересек, 13 мыңы – жасөспірім, 71 мыңы – бала.
Сонымен қатар өңірде жалпы өлім-жітімнің азаюы байқалады. Биылғы үш айда оның деңгейі 7%-ға төмендеген. Алайда осы жағдайға қарамастан қан айналымы жүйесі ауруларынан болатын өлім жағдайлары артып келеді.
Жыл басынан бергі үш айда өңірде қан айналымы жүйесі ауруларынан қайтыс болғандар саны 5,2%-ға өсіп, 100 мың адамға шаққанда 238,31-ден 250,66-ға дейін жеткен. Ең жоғары өсім Ұлан ауданында тіркеліп, былтырғы сәйкес кезеңмен салыстырғанда 1,6 есе артты. Сол сияқты Риддер қаласында – 1,4 есе, Тарбағатай ауданында 1,3 есе өскен.
Биылғы жыл басынан бері облыста қан айналым жүйесі ауруларын ерте анықтау мақсатында скринингтік тексерулер қолға алынған. Жоспар бойынша 3272 адам тексерілуге тиіс болса, 1 маусымға дейін 2369 адам тексеруден өтті. Бұл жоспарланған топтың 72%-ына тең. Тексерілген азаматтардың ішінде 55 адамда жүрек-қан тамырлары жүйесі аурулары анықталды, оның ішінде 48-інде артериялық гипертензия, жетеуінде ишемиялық жүрек ауруы болды. Тереңдетілген тексеруден кейін 36 пациент диспансерлік есепке алынды, – деді басқарма басшысының орынбасары.
Мамандардың айтуынша, медициналық көмектің қолжетімді болуына және алдын алу шараларына қарамастан, жүрек аурулары өлім-жітім себептері арасында әлі де алдыңғы орында тұр. Халықтың денсаулығын сақтау үшін тұрақты тексеруден өтіп, дер кезінде ем алу және салауатты өмір салтын ұстану өте маңызды екенін айта кету керек.
