Төтенше жағдайлар министрлігі көктемгі су тасқынына дайындық шараларын қолға алды. Еліміздің барлық өңірінде су қоймаларын кешенді тексеру, қардың қалыңдығына мониторинг жасау және гидротехникалық нысандардың жай-күйін тексеру арқылы ықтимал су басулардың алдын алу жұмыстары жүргізіліп жатыр, деп хабарлайды F16.kz.
ТЖМ Шығыс Қазақстан облысында «Семей – Алтай ауданы – Үлкен Нарын ауданы – Қатонқарағай ауданы – Семей» маршрутымен қар көшкіні және су тасқыны қаупі бар учаскелерге комиссиялық әуеден визуалды барлау жүргізді.
Бұқтырма өзені мұз астында, аздаған еріген жерлер мен ойпаттар бар. Сонымен қатар «Өскемен – Тайынты өзені (Ұлан ауданы) – Лайлы өзені (Самар ауданы) – Өскемен» маршрутымен жағдай тексерілді. Лайлы, Ешкібай және Төменгі Тайынты су қоймаларының бөгеттерін тұтас мұз жабыны басқан. Тексерілген аумақты толықтай қар басқан, — делінген министрлік хабарламасында.
Қазір өңірде қар көшкіні және гидрологиялық ахуал тұрақты, қар көшкіні қаупі тіркелмеген, гидротехникалық нысандар қалыпты режимде жұмыс істеп тұр.
