Алтай ауданының Северное ауылы маңында «Кажсервис» ЖШС Шығыс Қазақстан облыстық филиалының жүргізушісі қаза тапты. Қайғылы жағдай жол тазарту жұмысынан кейін, техникалық қызмет көрсету кезінде болған. Бұл туралы «КазАвтоЖол» ҰК» АҚ облыстық филиалының баспасөз қызметі хабарлады.
Шұғыл медициналық көмек көрсетілсе де жұмысшыны аман алып қалу мүмкін болмады. Ол ауыр жарақат салдарынан көз жұмды.
Қайғылы оқиға болған жерде жол пайдалану учаскесі орналасқан. Бұл – Өскемен-Алтай-Рахман қайнары республикалық жолының ең қиын учаскелерінің бірі. Дәл сол күні ауа райы бұзылуына байланысты аталған жол бөлігінде көлік қозғалысы шектелген, кейін қайта ашылды.
Қазір қызметтік тергеу жүріп жатыр. Арнайы комиссия құрылып, оқиғаның мән-жайын зерделеп, себептерін жан-жақты тексерілуге кірісті. Құқық қорғау органдары мен прокуратура қызметкерлері оқиға орнында жұмыс істеп жатыр. Мемлекеттік органдарға, оның ішінде еңбек инспекциясына тиісті ақпарат жіберілді, – деп жазды компанияның баспасөз қызметі.
Қаза тапқан жұмысшы жол саласында 25 жылдан астам уақыт еңбек еткен, өз ісінің нағыз маманы болған. Әріптестері оның жауапты әрі кәсібіне адал, тәжірибелі маман болғанын айтады.
Ұлттық компания қаза болған жұмысшының отбасына қажетті материалдық және басқа да қолдау көрсетілетінін хабарлады.
