Шығыс Қазақстан облысында аяқталған жылыту маусымы тек статистикалық деректермен емес, адам өмірін сақтап қалған қарапайым технологиялық шешімдердің тиімділігімен де есте қалды. Бүгінде қауіпсіздік шараларының ішіндегі ең маңыздысы – көміртегі тотығын анықтайтын датчиктер болып тұр. Кейінгі алты жылда бұл құрылғылар 45 адамның, оның ішінде 31 баланың өмірін ажалдан арашалап қалса, өткен жылыту маусымының өзінде екі тұрғын осы аспаптың арқасында аман қалды, деп хабарлайды F16.kz.
Облыстық төтенше жағдайлар департаменті ұсынған мәліметке сүйенсек, күні кеше аяқталған жылыту маусымында өңірдегі тұрғын үй секторында 341 өрт оқиғасы тіркелген, бұл былтырғымен салыстырғанда 2,2 пайызға төмен. Осы аралықта тілсіз жаудың салдарынан 22 адам қаза тауып, тағы 22 тұрғын түрлі дәрежеде жарақат алған.
Талдау нәтижелері көрсеткендей, мұндай апаттардың басты себебі – қарапайым өрт қауіпсіздігі ережелерінің сақталмауы. Төтенше жағдайлар департаментінің дерегінше, өрттің 70 пайызы тікелей азаматтардың кінәсінен болған. Оның ішінде 140 өрт оқиғасы пешті пайдалану кезінде жіберілген олқылық салдарынан туындаса, электр құралдарын дұрыс қолданбаудан 82 өрт болған.
Тұрғын үй секторы азаматтық қорғау органдарының тікелей бақылауында болмаса да, департамент қызметкерлері өрттің алдын алып, адам өмірін сақтау үшін ауқымды профилактикалық жұмыс жүргізіп келеді. Жылыту маусымы барысында мамандар 92 мыңнан астам үйді аралап, 330 кездесу өткізген, 12 мыңнан астам адамға қауіпсіздік нұсқаулығы берілді.
Әлеуметтік осал топқа жататын азаматтар тұратын пешпен жылытылатын 2 763 үй бақылауға алынып, тексеру барысында 700-ден астам қауіпсіздік ережесі бұзылған. Қазір пеш жабдықтары мен электр желілерін жөндеу жұмысы жалғасып жатыр, – деді облыстық төтенше жағдайлар департаментінің өкілі, азаматтық қорғау майоры Медет Мұқашев.
Мамандардың сөзінше, қауіпсіздікті қамтамасыз етудегі ең тиімді құрал – көміртегі тотығын анықтайтын аспаптар. Тек осы маусымның өзінде әлеуметтік осал топқа жататын отбасылардың үйіне 680 құрылғы орнатылып, соның арқасында екі адамның өмірін аман сақтап қалуға мүмкіндік туған. Жалпы, кейінгі 6 жылда облыс бойынша 17 мың аспап орнатылып, осы заманауи шешімдердің нәтижесінде 45 адам, оның ішінде 31 бала бір өлімнен қалған.
Төтенше жағдайлар департаменті өрт қауіпсіздігі құтқарушылардың ғана емес, әрбір азаматтың жеке жауапкершілігі екенін баса айтады. Мамандар жазғы кезеңде де босаңсуға болмайтынын ескертіп, пешті келер қысқа алдын ала дайындап, өрттің шығуына немесе көміртегі тотығымен улануға себеп болатын барлық кемшіліктерді жоюға кеңес береді. Департамент бұл бағыттағы жұмысын жалғастыра береді, ал өңірдегі өрт қауіпсіздігі жағдайы тұрақты бақылауда болады.
