Биылғы 1-3 сәуір аралығында Шығыс Қазақстанда күн күрт жылынады. «Қазгидромет» мәліметінше, ауа температурасының жоғарылауынан қар жылдам еріп, өзен-сулардың деңгейі көтерілуі мүмкін, деп хабарлайды F16.kz.
Синоптиктердің болжамынша, өңірде түнде ауа температурасы -5 градустан +3 градусқа дейін көтеріледі, ал күндіз 10–18 градусқа дейін жылынады. Күннің күрт жылынуынан өзендердегі мұз еріп, су деңгейі жоғарылайды.
Мамандар өзен арналарында мұз кептелуі мүмкін екенін ескертеді. Сонымен қатар еріген қар суы жазыққа жайылу қаупі бар.
ШҚО төтенше жағдайлар департаменті тұрғындарға қауіпсіздік шараларын сақтауға кеңес береді. Атап айтқанда, арықтар мен су ағатын жолдарды тазартып, су басу қаупі бар үйлердің маңын алдын ала бекіту үшін құм, топырақ секілді материалдар дайындау қажет. Қауіпті аймақта тұратын тұрғындарға азық-түлік пен қажетті заттарды оңай әрі қауіпсіз жерге қою, ауа райы болжамын тұрақты бақылау маңызды екені ескертілді. Төтенше жағдай туындаған жағдайда «112» нөміріне хабарласу қажет.
