Шығыс Қазақстан облысында қызылша жұқтырғандар анықталды. Қазір олардың саны бес адамға жеткен. Бұл туралы облыстық санитариялық-эпидемиологиялық бақылау департаменті растады, деп хабарлады F16.kz.
Ауру жұқтырғандардың үшеуі Өскемен қаласында анықталса, екеуі Тарбағатай және Глубокое аудандарында тіркелген.
Мамандардың мәліметінше, науқастардың үшеуі әртүрлі себептермен қызылшаға қарсы вакцина алмаған. Ал төрт адам инфекцияны Астана, Алматы қалаларынан және Абай облысынан жұқтырып әкелген болуы мүмкін деген болжам бар.
Жас ерекшелігіне қарай көрсеткіштер мынадай:
– 1 жасқа дейінгі нәресте – 1 жағдай;
– 1–4 жас аралығындағы балалар – 2 жағдай;
– 10–14 жастағы жасөспірім – 1 жағдай;
– 20–29 жас аралығындағы ересек адам – 1 жағдай.
Айта кетерлігі, былтыр осы уақыт аралығында өңірде қызылша дерегі мүлде тіркелмеген.
Санитариялық-эпидемиологиялық бақылау мамандары қызылшаның жұқпалы жедел вирустық инфекция екенін ескертеді. Ауру жұқтырған адамның әдетте дене қызуы көтеріліп, ауыз қуысы мен жоғарғы тыныс жолдарының шырышты қабығы қабынады, көзі қызарып(конъюнктивит), теріде бөртпе пайда болады және ағзада улану белгілері байқалады.
