4 маусым – Қазақстан Республикасының Мемлекеттік рәміздер күні. Бүгін шаһар жұртшылығы облыс орталығындағы Амфитеатр алаңында айтулы мерекені атап өтті, деп хабарлайды F16.kz.
Ұлттық құндылықтарды ұлықтайтын мерекенің шымылдығы Әнұран шырқалып, Мемлекеттік тудың көтерілуімен түпрілді. Артында жиналған жұртшылықты Шығыс Қазақстан облысының әкімі Нұрымбет Сақтағанов құттықтады.
Мемлекеттік Ту, Елтаңба және Әнұран – халқымыздың сан ғасырлық тарихын, асқақ рухын және жарқын болашаққа деген сенімін білдіретін қасиетті құндылықтар. Олар әрбір қазақстандықтың жүрегінде Отанға деген мақтаныш сезімін оятып, ел игілігі жолында адал қызмет етуге үндейді. Біз мемлекеттік рәміздерімізді қадірлей отырып, егемен еліміздің гүлденуі мен өркендеуі жолында аянбай еңбек етуіміз керек. Еліміздің бірлігі нығайып, ынтымағы арта берсін. Мереке құтты болсын! — деді облыс әкімі.
Аймақ басшысы өз сөзінде Тәуелсіздік туын биік ұстау, мемлекетіміздің абыройын асқақтату – Отан күзетінде тұрған әрбір ұланның ғана емес, барша қазақстандықтың ортақ міндеті екенін жеткізді.
Мемлекеттік рәміздеріміздің мәртебесін арттыруға арналған жиын өңірдің өркендеуіне елеулі үлес қосқан түрлі сала мамандарын марапаттау рәсімімен жалғасты. Қазақстан Республикасы Президентінің Жарлығымен «Құрмет» ордені Катонқарағай ауданындағы Сейітқамза Ластаев атындағы орта мектептің математика пәнінің мұғалімі Назигүл Жылмасбаеваға және Ұлан ауданындағы М.Ломоносов атындағы орта мектептің ағылшын тілі пәнінің мұғалімі Майнұр Ескендіроваға табысталды. Ал «Ерен еңбегі үшін» медалі Маркакөл ауданындағы Қалжыр орта мектебінің математика пәнінің мұғалімі Жанат Жікбаева мен Өскемен қаласындағы Шәкәрім атындағы №1 орта мектептің география пәнінің мұғалімі Гүлбаран Ибраеваға және Глубокое ауданындағы Белоусовка орта мектебінің математика пәнінің мұғалімі Елена Саблеваға берілді.
Мен өмірімнің 43 жылын болашақ ұрпақты тәрбиелеп, білім беруге арнадым. Бүгін осы еңбегім бағаланып, «Ерен еңбегі үшін» медаліне ие болдым. Бұл марапат – менің жылдар бойғы еңбегімнің жемісі. Биылғы тағы бір оқу жылын артты қалдырдық. Барлық білім саласында қызмет етіп келе жатқан әріптестеріме сәттілік, шығармашылық табыс тілеймін. Аспанымыз ашық, еліміз тыныш болсын, — деді Гүлбаран Ибраева.
Сондай-ақ аймақ басшысы шара барысында жаңадан қабылданған жас мамандарға мемлекеттік қызметшінің куәлігін салтанатты түрде табыс етті
