Шығыс Қазақстанда 200 гектарға жуық аумақты шарпыған 21 орман өрті тіркелді. Оның басым бөлігі найзағай салдарынан тұтанған, деп хабарлайды F16.kz.
Облыстық орман шаруашылығы және жануарлар дүниесі аумақтық инспекциясының мәліметіне сүйенсек, орман өртінен келтірілген шығып көлемі 1,6 миллион теңгеден асып отыр.
Айта кетейік, күн райының күрт ысуына байланысты өңірде өрт қаупі әлі де жоғары.
Тұрғындар мен туристердің қауіпсіздігін қамтамасыз ету мақсатында өрт қаупінің V-інші класы жарияланған аймақтарда, атап айтқанда Өскемен қаласы, Үлкен Нарын, Күршім, Катонқарағай, Самар және Зайсан аудандарында орманға кіруге шектеу қойылды.
Орманда тәулік бойы бақылау күшейеді. Жауапты мекемелерде тәулік бойы кезекшілік ұйымдастырлып, халыққа түсіндіру жұмыстары жүргізіліп жатыр, — дейді инспекция мамандары.
Сондай-ақ ШҚО ТЖД мен инспекция өкілдері тұрғындарды өрт қауіпсіздігі ережелерін қатаң сақтауға шақырады. Орман маңында от жағуға, ашық от пайдалануға қатаң тыйым салынғанын ескертеді.
