Шығыс Қазақстан облысында 250-ден астам инновациялық жоба жүзеге асырылып жатыр. Бұл туралы Үкімет отырысында облыс әкімі Нұрымбет Сақтағанов мәлім етті, деп хабарлайды F16.kz.
Аймақ басшысының айтуынша, өңірде металлургия, медицина, цифрлық технологиялар және агроөнеркәсіп салаларындағы жаңашыл жобаларға ерекше көңіл бөлінген.
Жобалардың қатарында мемлекеттік, халықаралық және ғылыми-зерттеу бастамалары бар. Мәселен, тау-кен металлургия кешенін дамыту аясында Д.Серікбаев атындағы Шығыс Қазақстан техникалық университеті, Үлбі металлургиялық зауыты және облыс әкімдігі бірлесіп жаңа жобаны қарастырып жатыр. Жоба отын таблеткаларын өндіруге арналған жабдықтың қызмет ету мерзімін ұзартуға бағытталған. Бұл өз кезегінде импортқа тәуелділікті азайтып, өнімнің өзіндік құнын төмендетуге мүмкіндік береді, – деді өңір басшысы.
Сонымен қатар «Horizon» бағдарламасы аясында Үлбі металлургиялық зауыты жоғары берік қорытпаларды қайта өңдеу үшін 8 миллион еуро көлемінде грант ұтып алған. Бұл жоба бериллий өндірісін 5%-дан 9%-ға дейін арттыруға жол ашады.
Халықаралық ынтымақтастық та дамып келеді. Машина жасау саласында Лу Бань шеберханасы жұмыс істейді, ал тау-кен ісі мен геологияда Қазақстан-Германия ғылым және технологиялар институтының алаңдары іске қосылған.
Ауыл шаруашылығы саласында да тың жоба қолға алынбақ. С.Аманжолов атындағы Шығыс Қазақстан университеті ғалымдарымен бірлесіп, ылғал сақтайтын, топырақ құнарын арттыратын және өсімдіктердің өсуін жақсартатын биоыдырайтын гидрогель әзірлеу жоспарда бар. Бұл бірегей технологияны негізінен агроөнеркәсіп кәсіпорындары пайдаланады.
Цифрландыру бағытында да нақты жобалар қолға алынған. Өңірде маңызды салаларды бақылауға арналған өңірлік аналитикалық орталық іске қосылған. Оның құрамына 6 мыңнан астам бейнебақылау камерасы, ауа сапасын өлшейтін 25 бекет және жылумен жабдықтау көздерін бақылайтын 23 аспап кіреді. Жалпы, аталған жобалар өңірдің ғылыми-технологиялық әлеуетін арттырып, экономиканың түрлі салаларын дамытуға бағытталған.
