ШҚО-да электр самокаттарын пайдалану кезіндегі қауіпсіздікті қамтамасыз ету және жол-көлік оқиғаларын азайту шаралары талқыланды, деп хабарлайды F16.kz.
ҚР Президенті Қасым-Жомарт Тоқаев Қазақстан халыққа Жолдауында электр самокаттар мен өзге де жеке мобильділік құралдарын пайдалану саласында тәртіп орнату қажеттілігін ерекше атап өтті. Бүгінде Шығыста жол қозғалысы қауіпсіздігі мәселесі ерекше бақылауға алынған.
ШҚО ПД баспасөз қызметінің деректеріне сүйенсек, жыл басынан бері облыста электр самокаттарының қатысуымен 6 жол-көлік оқиғасы тіркеліп, 6 адам жарақат алған. Сондай-ақ 14 әкімшілік хаттама толтырылып, 54 самокат айыппұл тұрағына қойылды.
Біз «Заң мен тәртіп» қағидатын қатаң ұстануымыз қажет. Жолдағы қауіпсіздік – әрбір азаматтың жауапкершілігі. Полиция, мемлекеттік органдар және бизнес өкілдері күш біріктірген жағдайда ғана халық үшін қауіпсіз жағдай жасай аламыз, – дейді ШҚО Полиция департаменті бастығының орынбасары Рифхат Тауфиков.
Жиын қорытындысы бойынша құқықбұзушылықтардың алдын алу және ынтымақтастықты нығайту жөнінде нақты ұсыныстар қабылданып, бұл бағыттағы жұмыс жүйелі түрде жалғасатын болды.
