Шығыс Қазақстан облысында қарғын су қауіп әлі де сейілмей тұр. Өңірде сәуір айының үшінші онкүндігінен мамыр айының екінші онкүндігіне дейін су тасқынының екінші кезеңі өтеді, деп хабарлайды F16.kz.
Қазіргі таңда облыс аумағының 19%-ында қар жамылғысы сақталған.
Мүдделі мемлекеттік органдар өзара іс-қимыл шеңберінде барлық су тасқыны қаупі бар учаскелер мен гидротехникалық құрылыстарды бақылауға алды. Сондай-ақ су тасқынына қарсы іс-шаралар барысы пысықталып жатыр. Өңірде каналдар, арықтар, су өткізу құрылыстары мен көпірлерді ауқымды тазалау жұмыстары жүргізілді. Нәтижесінде 226 шақырым арна, 504 шақырым арық тазартылып, 4778 су өткізу құрылысы мен 409 көпір ретке келтірілді. 430 мың текше метрден астам қар шығарылды, – деді ШҚО ТЖД бастығының орынбасары Амангелді Енсегенов.
Облыс бойынша су тасқыны қаупі бар 71 елді мекен тіркелген. Онда шамамен 3,5 мың тұрғын үй орналасқан және 8,6 мыңға жуық адам тұрады. Жүргізілген алдын алу шараларының нәтижесінде 16 елді мекенде су басу қаупі толық жойылды, 50 елді мекенде тәуекел деңгейі төмендетілді, ал 5 елді мекенде қауіп сақталуда. Аталған елді мекендер Глубокое ауданы мен Алтай ауданы аумақтарында орналасқан.
Қазіргі уақытта облыстағы гидрологиялық жағдай тұрақты. Өзендердегі су деңгейі қауіпті шектен төмен, су тасқыны фактілері тіркелген жоқ. Дегенмен, жағдай тәулік бойы бақылауда. Мониторинг барысында мамандар таулы аудандардағы қар қорын және жалпы ахуалды тұрақты түрде бағалап отыр, — дейді ШҚО ТЖД баспасөз қызметі.
Қабылданған алдын алу шаралары тұрғындардың қауіпсіздігін қамтамасыз етіп, су тасқыны кезеңінің тұрақты өтуіне мүмкіндік береді.
