ҚР Төтенше жағдайлар вице-министрі, генерал-майор Кеген Тұрсынбаев жұмыс сапары шеңберінде Шығыс Қазақстан облысының су тасқыны қаупі бар учаскелерін тексерді, деп хабарлайды F16.kz.
Вице-министр гидрологиялық жағдайды және биік таулы мореналық көлдердің, сел учаскелерінің жай-күйін анықтау үшін су айдындарына аэровизуалды мониторинг жүргізді.
Сондай-ақ Алтай, Үлкен-Нарын, Катонқарағай және Шемонаиха аудандарының су тасқыны қаупі бар учаскелерінде орындалған инженерлік жұмыстармен танысты.
ШҚО ТЖД бастығы Рашид Блялов күштер мен құралдардың дайындығы туралы баяндап, аудан әкімдіктері су басудың алдын алу бойынша атқарылған жұмыстар туралы ақпарат берді.
Өңірде қазір 28 инженерлік іс-шара орындалған. Атап айтқанда, қорғаныс бөгеттерін жөндеу, су бұру арналарын тазарту және тереңдету, автомобиль жолдарында көпір салу және жөндеу жұмыстары жүргізілді.
«ШҚО әкімінің Ахуалдық орталығы» ақпараттық жүйесінде су тасқыны жағдайын мониторингтеудің бірыңғай кешені жұмыс істеп тұр. Жүйе 49 гидропостар бойынша 7 күндік болжамын жасайды, тәуекелдерді ерте анықтауға және алдын ала шара қабылдауға мүмкіндік береді.
Су тасқынына қарсы іс-шаралар барлық қызметтердің уақтылы және үйлесімді жұмысын талап етеді. Басты міндет – халық пен инфрақұрылым үшін тәуекелдерді барынша азайту. Барлық шұғыл қызметтер жедел ден қоюға дайын болуға тиіс,-деп атап өтті вице-министр Кеген Тұрсынбаев.
Сапар соңында вице-министртөтенше жағдайларға жедел ден қоюды жақсарту жөнінде бірқатар тапсырмалар беріп, облыстағы төтенше жағдайлардың алдын алу және жою жүйесін одан әрі нығайту жөнінде міндеттер қойды.
