Шығыс Қазақстанда сүт өндірісі 13%-ға артып, агроөнеркәсіп кешеніндегі қайта өңдеу үлесі 70%-ға жетті. Бұл туралы облыстық мәслихаттың кезекті сессиясында мәлім болды, деп хабарлайды F16.kz.
БИЫЛ ЖЕТІ ЖОБА ІСКЕ ҚОСЫЛАДЫ
Депутаттар алдында есеп берген аймақ басшысы Нұрымбет Сақтағанов өңірде ауыл шаруашылығы саласында жиырмадан астам инвестициялық жоба іске асырылып жатқанын атап өтті.
Бүгінде ауыл шаруашылығы саласында 89 млрд теңгенің 21 инвестициялық жобасы жүзеге асырылып жатыр. Жеті жоба биыл іске қосылады. Оның ішінде қуаттылығы жылына 150 мың тонна өнім өндіретін «Алтай май» май экстракциялық зауыты бар, — деді облыс әкімі.
ШАРУАЛАР СУ ҮНЕМДЕУГЕ КӨШТІ
Президенттің суды ұтымды пайдалану жөніндегі тапсырмасына сәйкес, Ұлан, Зайсан және Тарбағатай аудандарында су үнемдейтін технологиялар белсенді түрде қолданылып жатыр. Агрохабтар мен логистикалық орталықтардың дамуына да ерекше назар аударылған.
Өскеменде сыйымдылығы 45 мың тоннаға жететін заманауи көкөніс қоймалары бар «Алтай» көтерме-бөлшек сауда орталығы пайдалануға берілді. Бұл ауыл шаруашылығы тауарын өндірушілерге нарыққа тікелей шығып, тұрғындарға қолжетімді бағада сапалы өнім ұсынуға мүмкіндік береді. Сондай-ақ 2026 жылдың ортасына дейін барлық қайтарылған жерлерді айналымға тарту жоспарланған. Қазір 423 мың гектар жердің 97 мыңы игерілді, — деді Нұрымбет Сақтағанов.
