Облыс орталығында 12–14 жас аралығындағы кадеттер арасында таеквондодан (WT) Қазақстан Республикасының чемпионаты өтіп жатыр, деп хабарлайды F16.kz.
11 мамыр күні басталған чемпионатқа еліміздің түкпір-түкпірінен 852 спортшы келген. Оның ішінде 428 ұл және 424 қыз өзара кіл мықтыны анықтайтын болады.
Жарыстың алғашқы күні ШҚО әкімі Нұрымбет Сақтағанов чемпионат жеңімпаздары мен жүлдегерлерін марапаттау рәсіміне қатысып, спортшыларға сәттілік тіледі.
Жарыс күнінің қорытындысы бойынша медальдар төрт салмақ дәрежесінде сарапқа салынды. Қыздар арасында 33 келі және 55 келі, ұлдар арасында 37 келі мен 65 келіден жоғары салмақ дәрежелері бойынша жеңімпаздар анықталды.
Жеңімпаздар мен жүлдегерлер қатарында Атырау, Жамбыл, Павлодар, Қызылорда, Маңғыстау Ұлытау облыстары мен Астана, Алматы, Шымкент қалаларынан келген спортшылар бар.
