Шығыс Қазақстан облысында туристердің қауіпсіздігін қамтамасыз ету мақсатында әзірленген саяхатшыларды қашықтан тіркеу жүйесі сәтті жұмыс істеп тұр, деп хабарлайды F16.kz.
Облыстық төтенше жағдайлар департаменті баспасөз қызметінің мәліметінше, жүйеге тіркелген 35 туристік топ (170-тен астам адам) ешқандай оқыс оқиғасыз саяхаттап қайтқан.
Тіркелу өте оңай, турист арнайы QR-кодты сканерлеп, маршрутты, саяхаттау күні мен байланыс деректерін көрсете отырып онлайн форманы толтырады. Бұл ақпарат бірден ТЖД-ның жедел орталығына түседі. Қажет болған жағдайда құтқарушылар жедел әрекет етіп, көмек көрсете алады.
Маршрут аяқталған соң турист өзін-өзі есептен шығара алады немесе құтқарушылардың қоңырауын күтеді.
Жүйе қазақ, орыс, ағылшын және қытай тілдерінде жұмыс істейді. Мамандардың айтуынша, тіркеуден өтпеген туристер төтенше жағдайға тап болғанда оларды іздестіру-құтқару жұмыстары қиындайды. Өйткені оның бәріне уақыт кетеді. Ал жүйеде қажетті деректер тұрса жедел әрекет етуге мүмкіндік жоғары.
Айта кетейік, бұл жүйені ШҚО ТЖД мен цифрландыру басқармасы бірлесіп жасаған.
