Шығыс Қазақстан облысының Самар ауданында интернационалист жауынгерлерді еске алу күніне орай дәстүрлі садақ ату жарысы өтті. Аудандық деңгейде ұйымдастырылған турнирге ауылдық округтерден 30-ға жуық спортшы қатысып, мергендігін сынады, деп хабарлайды F16.kz.
Аудан әкімі баспасөз қызметінің мәліметінше, жарыстың басты ерекшелігі – қатысушылардың жас ерекшелігіне шектеу қойылмауы. Бір алаңда аға буын өкілдері мен жастар қатар өнер көрсетіп, өзара тәжірибе алмасуға мүмкіндік алды.
Аудандық Жастар орталығының директоры Ерназар Сауықтың айтуынша, мұндай іс-шаралар ұлттық спорт түрлерін дамытуға және үздік мергендерді анықтауға ықпал етеді.
Қазір ауданда садақ ату спорты қарқынды дамып келеді. Турнирлерді тұрақты түрде өткізіп, болашақта үздік спортшыларды ірі жарыстарға қатыстыруды жоспарлап отырмыз, – деді ол.
Турнир төрешісі, Абай облысы Көкпекті ауданының садақ ату жаттықтырушысы Дамир Даутов самарлық жастардың әлеуетіне жоғары баға берді. Оның пікірінше, спортшылардың қызығушылығы мен дамуға деген талпынысы айқын байқалады.
Самар ауданында мергендер даярлап, жоғары деңгейге шығуға толық мүмкіндік бар. Ең бастысы – жүйелі жаттығу мен тұрақты қолдау, – деді жаттықтырушы.
Миролюбовка ауылындағы тұратын 11-сынып оқушысы, турнирдің қола жүлдегері Әдемі Сабазова сайыстан алған әсерін жеткізді. Ол садақ атумен екі жылдан бері айналысып келеді.
Алдымен ауылымыздағы әйелдер арасындағы жарыстарға қатыстым, кейін Көкпекті ауданында өткен турнирде бірінші орын алдым. Алдағы уақытта бұдан да жоғары жетістіктерге жеткім келеді. Бұл – біздің ұлттық мұрамыз, оны жаңғыртуымыз қажет, – деді ол.
Жарыс спорттық бәсекелестік пен тарихи дәстүрге деген құрмет рухында өтті. Іс-шараның негізгі мақсаты – ұлттық спортты дәріптеу, жастарды салауатты өмір салтына баулу және мәдени мұраны сақтау.
Жарыс қорытындысы бойынша жеңімпаздар мен жүлдегерлерге дипломдар және ақшалай сертификаттар табыс етілді.
