ШҚО-да жастар мен жас мамандарға арналған ипотекалық бағдарлама іске қосылуы мүмкін. Бұл туралы жастар ісі жөніндегі кеңестің отырысында облыс әкімі Нұрымбет Сақтағанов айтты, деп хабарлайды F16.kz.
Айта кетейік, бүгін облыс әкімдігі жанындағы жастар ісі жөніндегі кеңестің алғашқы отырысы өтті. Кездесуде алда келе жатқан саяси науқанның маңызы, жастардың көзқарасы, басқа да өзекті мәселелер талқыланып, бірқатар ұсыныс айтылды.
Жиында сөз алған жастардың көтерген мәселесі – «Отбасы банк» арқылы төмендетілген пайызбен жастар мен жас отбасыларға арналған ипотекалық бағдарламаны іске қосу.
2024 жылы біз «Отбасы банкпен» бірлесіп «Шығыс маманы» бағдарламасын іске қостық. Алайда ол жылу энергетика саласында еңбек ететін қызметкерлерге ғана арналған. «Шығыс маманы» бағдарламасының талаптарын өзгертуді немесе жастарға арналған басқа бағдарлама енгізуді қарастырамыз. Жауапты мамандарға тапсырма беріп, келер жылы іске асыруға барымызды саламыз, — деді ШҚО әкімі Нұрымбет Сақтағанов.
Қазір Шығыс Қазақстанда 170 мыңнан астам жас тұрады. Олардың білім алып, еңбек етіп, жан-жақты дамуы үшін тиісті жағдайлар жасалып келеді. Аймақтағы үш жоғары оқу орны мен 37 колледжде еңбек нарығында сұранысқа ие мамандықтар бойынша 35 мыңнан астам студент білім алып жатыр. Былтыр жұмыспен қамту шараларымен 7 мыңнан астам жас қамтылды. Әлеуметтік тұрғыдан осал санаттағы 71 жас өз бизнес-идеяларын жүзеге асыру үшін грант иегері атанды. Сондай-ақ кәсіпкерлікті қолдау аясында жас мамандарға жалпы сомасы 17,5 млн теңгенің төрт қайтарымсыз мемлекеттік гранты берілді. Биыл «Жастар практикасы» және «Жасыл ел» бағдарламалары аясында 2 мың жас жұмыспен қамтылмақ.
