Ұлттық статистика бюросы 2026 жылғы қыркүйек қорытындысы бойынша тұрғын үйді сатып алу-сату мәмілелерінің саны туралы деректерді жариялады. Мәліметтерге сәйкес, сатып алу белсенділігінің төмендеуіне байланысты сату көрсеткіші құлдырап жатыр.
«2026 жылғы қыркүйекте тұрғын үйді сатып алу-сату бойынша 35 406 мәміле тіркелген. 2026 жылғы тамызбен (35 807) салыстырғанда мәмілелер саны 1,1 пайызға азайды», — делінген статистика бюросы шолуында.
Ең көп тұрғын үй сатылған өңірлер:
Алматы — 7 248, немесе жалпы көлемнің 20,5 пайызы;
Астана — 6 119, немесе 17,3 пайызы;
Қарағанды облысы — 2 540, немесе 7,2 пайызы.
Ең аз сатылым Ұлытау облысында байқалады – бар болғаны 280 мәміле немесе нарықтың жалпы көлемінің 0,8 пайызы.
«2026 жылғы тамызбен салыстырғанда ең жоғарғы өсім Түркістан (24,8пайыз), Жамбыл (13,3пайыз) және Жетісу (12,1пайыз) облыстарында тіркелді. Ең үлкен төмендеу Қостанай (-10,2пайыз), Қарағанды (-10,1пайыз) облыстарында және Алматыда (-5,7пайыз) болды», — делінген статистикада.
2026 жылғы қыркүйекте сатылған тұрғын үйдің жалпы көлемінің 76,5 пайызы немесе 27 096 мәміле пәтерлерге тиесілі (бұл 2026 жылдың тамызына қарағанда 623 мәмілеге аз). Негізгі үлесі Алматы, Астана мен Қарағанды облысында. Сұраныс бойынша бір бөлмелі пәтерлер көш бастап тұр — 10 434 мәміле.
Жеке үйлер бойынша қыркүйекте 8 310 мәміле жасалды — бұл 2026 жылдың тамызына қарағанда 222 мәмілеге көп. Өсім Ақтөбе, Түркістан және Шығыс Қазақстан облыстарында байқалды. Ал Қарағанды, Павлодар және Ұлытау облыстарында сатылым төмендеген.
Деректерді жылдық кезеңмен салыстырғанда, 12 ай ішінде сатылым 14,3 пайызға (41 313-тен 35 406 мәмілеге дейін) азайған.
