Риддерде шағын және орта кәсіпкерліктің тынысын ашатын ірі инвестициялық жобалар жүзеге асырылып, жаңа жұмыс орындары құрылып жатыр. Соның бірі – былтыр ашылған заманауи үлгідегі Steak King супермаркеті. Кенді шаһарға жұмыс сапарымен барған Шығыс Қазақстан облысының әкімі Нұрымбет Сақтағанов сауда орталығын аралап, азық-түлік бағасына назар аударды, деп хабарлайды F16.kz.
Жеке кәсіпкер Владимир Ситников ашқан супермаркеттің жалпы ауданы – 1 мың шаршы метр. Жобаны іске асыруға жиыны 250 млн теңге жұмсалған, оның 120 млн теңгесі мемлекеттік қолдау түрінде берілсе, қалғаны – жеке инвестордың қаражаты.
Кәсіпкердің айтуынша, инвестжоба заманауи сауда инфрақұрылымын дамытуға және тұрғындарды сапалы азық-түлікпен, басқа да қажетті өнімдермен қамтамасыз етуге бағытталған.
Сауда орталығында негізінен жергілікті кәсіпкерлердің өнімдері қойылған. Өйткені қала тұрғындары өзімізде өндірілген азық-түлікті жақсы алады. Мәселен, Черемшанканың шұжықтары мен ет өнімдеріне сұраныс жоғары. Ең бастысы тауар сапалы болуы керек, – деді Владимир Ситников.
Сауда орталығы заманауи үлгіде салынған және тиісті талаптарға сай келеді. Онда тоңазытқыштан бастап барлық қажетті жабдықтар бар. Қойма, қосалқы бөлмелер де қарастырылған. Нысанның айналасы абаттандырылған. Қазір онда 22 адам тұрақты жұмыс істейді.
Супермаркетті аралаған аймақ басшысы мұндай жобалар кәсіпкерліктің дамуына серпін беріп, халыққа көрсетілетін сауда қызметінің сапасын арттыруға және өңірдің әлеуметтік-экономикалық әлеуетін нығайтуға оң ықпал ететінін атап өтті.
