ШҚО-да күннің күрт суытуына байланысты 1 қазаннан бастап жылыту маусымы басталды. Бүгінде Өскемен, Риддер қалаларында және облыстың солтүстік аудандарында орталықтандырылған жылу желісі іске қосылды, деп хабарлайды F16.kz.
Өңірдегі балабақша, мектеп, аурухана сияқты әлеуметтік нысандардың барлығы жылуға бұдан ертерек қосылған. Қалған аудандарда жылу кезең-кезеңімен беріліп жатыр. Көпқабатты тұрғын үйлерді жылуға қосу техникалық регламенттерге сәйкес жүргізіледі.
Облыстағы 190 автономды және 33 орталықтандырылған қазандық жылыту маусымына толық әзір. Оларды қосу температуралық кестеге сәйкес жүргізіліп келеді. Өңір бойынша 52,8 шақырым жылу желілері қайта жаңғыртылып, күрделі жөндеуден өтті. Жалпы ұзындығы 537 шақырым электр желілері, 39 қосалқы станция және 55 трансформаторлық қосалқы станция күрделі жөндеуден өтті. Апаттардың алдын алу мақсатында 243 шақырым электр желілері бойында орналасқан ағаш бұтақтарын қосымша кесу жұмыстары жүргізілді. Бұл жұмыс жыл соңына дейін жалғасады, — деп хабарлады облыс әкімінің баспасөз қызметі.
Облыста үш жылу электр орталығы жұмыс істеп тұр. Риддер қаласындағы орталықтың жылыту маусымына дайындығы басты назарға алынған. Онда ауқымды жөндеу жұмыстары жүргізіліп, қажетті қуат резерві жасалды. Биыл жылу желілерінің жалпы ұзындығы 6 шақырымға жететін 23 учаскесі жөнделді.
Инженерлік желілер мен жылу көздерінде техникалық ақаулар туындаған жағдайда коммуналдық қызметтер мен жергілікті атқарушы органдардың іс-қимыл алгоритмі әзірленіп, бекітілді. Апаттық бригадалар құрылып, қажетті арнайы техникамен және материалдармен қамтамасыз етілді. ҚР Энергетика министрлігімен, «Қазақстан темір жолы» ҰК» АҚ және «Қаражыра» АҚ-мен бірге өңірге отынның уақтылы жеткізілуін қамтамасыз ету бойынша жұмыс қолға алынған, — деп атап өтті әкімдік өкілдері.
Ресми мәліметтерге сүйенсек, бюджеттік ұйымдар отынмен толық қамтамасыз етіліп, халық үшін 332,4 мың тонна көмір (жоспарланған көлемнің 73%-ы) дайындалған. Барлық жылу көздерінде көмірдің нормативті қоры (424,4 мың тонна) бар. Ол кем дегенде 20 тәулікке жетеді.
Жергілікті атқарушы органдар көмірдің жеткізілу барысын күнделікті бақылап, бағаның негізсіз өсуіне жол бермеу бойынша тиісті жұмысты жүргізіп жатыр.
