Шығыс Қазақстан облысының делегациясы ШЫҰ халықаралық семинары аясында Қытайдың Қарамай қаласындағы заманауи цифрлық инфрақұрылым нысандарын аралады. Сапар барысында өңір өкілдері IT-хабтар, индустриялық парктер және ауқымды деректер орталықтарының жұмысымен танысып, цифрлық экономиканың нақты іске асу үлгілерін көрді, деп хабарлайды F16.kz.
Делегация мүшелері ерекше назар аударылған нысандардың бірі есептеу жүйелерінің индустриялық паркі болды. Мұнда бұлтты технологиялар, жасанды интеллект және телекоммуникация салаларындағы ең жаңа әрі озық шешімдер таныстырылды. Сонымен қатар цифрлық өнімдердің тек теорияда емес, нақты өндірістік және басқарушылық процестерде қалай қолданылатыны көрсетілді.
Бағдарлама аясында делегация жергілікті IT-парк пен индустриялық паркке де барды. Бұл орталықтар стартап жобалардан бастап ірі инфрақұрылымдық цифрлық шешімдерге дейінгі әртүрлі деңгейдегі жобаларды біріктіретін кешенді алаң ретінде жұмыс істейді. Қарамайдағы бұл нысандар Шыңжан-Ұйғыр автономиялық ауданындағы ең ірі технологиялық кластерлердің бірі саналады.
Сапар барысында цифрлық экономиканы дамытуға бағытталған мемлекеттік бағдарламалар, IT-компанияларды қолдау тетіктері және технологиялық шешімдерді ауқымдауға арналған стратегиялар кеңінен таныстырылды. Кадр даярлау жүйесі мен инновацияларды енгізу тәжірибесі қонақтардың қызығушылығын туғызды.
Өскемен жоғары политехникалық колледжінің жабдықтар жөніндегі инженері, делегация мүшесі Михаил Баженов сапардың практикалық маңызын атап өтті.
Цифрлық технологиялар саласындағы кадр даярлау бағдарламасының мазмұндылығы ерекше әсер қалдырды. IT-хабтарға бару барысында есептеу қуаттарын дамыту, цифрлық трансформация және жасанды интеллект негізінде қосымшалар әзірлеу сияқты бағыттар кеңінен қарастырылды. Бұл бізге тек жаңа білім алуға емес, оны нақты тәжірибеде көруге мүмкіндік берді. Сондай-ақ трансшекаралық цифрлық ынтымақтастық мәселелері де талқыланды, – деді ол.
Мамандардың пікірінше, мұндай тәжірибе алмасу өңірлер арасындағы технологиялық байланысты күшейтіп қана қоймай, цифрлық экономиканы дамытудағы жаңа әріптестік бағыттарды қалыптастыруға жол ашады.
