2023-2025 жылдар аралығында Шығыс Қазақстанға квотамен 702 отбасы көшіп келген. Биыл жоспарланған өңірлік квота 800 адамды қамтып отыр. Бұл туралы облыс әкімдігінде өткен жиында айтылды, деп хабарлайды F16.kz.
Жиында Көші-қон бағдарламасы аясында еңбек күші артық өңірлерден қоныс аудару шеңберінде атқарылып жатқан жұмыстар жайы талқыланды.
Кейінгі үш жылда, яғни 2023-2025 жылдары өңірге ерікті қоныс аудару бағдарламасының квотасы бойынша 702 отбасы, яғни жалпы саны 2 206 адам көшіп келді. 2025 жылы 313 отбасына материалдық көмек көрсетілді. Биыл өңірлік квота жоспары 800 адамды, 600 қоныс аударушы және 200 қандасты қамтиды, — делінген ШҚО жұмыспен қамту және әлеуметтік бағдарламаларды үйлестіру басқармасының мәліметінде.
Биылғы қаңтардан бастап Марқакөл, Катонқарағай, Тарбағатай және Самар аудандарында пилоттық режимде қоныс аударуды қолдаудың «Шығыс шақырады» өңірлік жоспары іске асырыла бастады. Жоспарға сәйкес, «Оңтүстік – Шығыс маманы» жобасы арқылы «Отбасы банк» АҚ-мен жеңілдетілген ипотекалық несие беру тетігін қолдана отырып, жоғары білікті кадрлар тартылмақ. Сондай-ақ қоныс аударушылар мен қандастар арасында кәсіпкерлікті қолдау үшін 750 АЕК-ке дейінгі мөлшерде нысаналы гранттар беріледі.
Біздің басты міндетіміз — адамдарға осы өңірде өмір сүру, еңбек ету және болашағын құру үшін тартымды орта қалыптастыру. Ол үшін тұрғын үй, әлеуметтік инфрақұрылым және сапалы мемлекеттік қолдау нақты нәтижеге бағытталуы қажет. Еңбекке қабілетті отбасы мүшелерін тұрақты жұмысқа орналастыру бағытындағы жұмысты күшейту керек. Қала, аудан әкімдері көшіп келген әр жанұяға жанашырлықпен қарап, үйлеріне барып қал-жағдайларын біліп, жан-жақты көмек көрсетуге тиіс, — деді ШҚО әкімі Нұрымбет Сақтағанов.
