Биылғы 6 айда ШҚО аумағындағы кәсіпорындарда 45 жазатайым оқиға тіркеліп, 50 адам зардап шекті, оның ішіндегі 6 оқиға кісі өлімімен аяқталды, деп хабарлайды F16.kz тілшісі.
Бүгін Өңірлік коммуникациялар қызметінде өткен брифингке ҚР Еңбек және халықты әлеуметтік қорғау министрлігі Мемлекеттік еңбек инспекциясы Комитетінің ШҚО бойынша департаментінің басшысы Бақытбек Қизатов қатысып, алты айдағы жұмыс қорытындысы жайында әңгімелеп берді.
Оның айтуынша, өткен жылдың сәйкес кезеңімен салыстырғанда облыста өндірістік жарақаттану деңгейі 3,8%-ға төмендеп, өліммен аяқталған оқиғалар – 25%-ға, ал ауыр зардапты оқиғалар – 3,8%-ға азайған.
– Облыста 39 арнайы тергеп-тексеру амалдары жүргізіліп, 90 лауазымды тұлға тәртіптік жауапкершілікке тартылды, 4 қызметкер жұмыстан шеттетілді. Сондай-ақ, 39 қылмыстық іс қозғалып, 4 лауазымды тұлға қылмыстық жауапкершілікке тартылды, 4 материал бойынша сотқа дейінгі тергеу жүргізілуде, – деп хабарлады Б.Қизатов.
Белгілі болғандай, жауапқа тартылғандардың арасында былтыр Глубокое мен Шемонаиха аудандарындағы кеніштерде жазатайым оқиғаларға жол берген лауазымды тұлғалар да бар. Еске салайық, былтыр 31 тамыз бен 1 қыркүйекте болған екі оқыс оқиға салдарынан 5 адам қайтыс болған.
Департамент басшысының айтуынша, өліммен аяқталған және ауыр зардапты жазатайым оқиғаларға жол берген кәсіпорын басшыларының мәселесі облыстық үшжақты комиссияның 3 отырысында және еңбек қауіпсіздігі және еңбекті қорғау жөніндегі Сараптамалық кеңестің 1 отырысында тыңдалды.
Ол, сонымен қатар «ШҚО-да 2024-2030 жылдарға арналған Қауіпсіз еңбек тұжырымдамасын іске асыру жөніндегі Жол картасы» бекітілгенін айтты.
– Ағымдағы жылдың 6 айында жеке және заңды тұлғалардың 790 өтініші қаралды. Салыстырмалы түрде алып қарайтын болсақ, 2024 жылдың 6 айында дәл осындай 953 өтініш қаралған. Сондай-ақ биылғы алғашқы жартыжылдықта 166 тексеру жүргізіліп, 103 ұйғарым берілді, 188 заңбұзушылық анықталды. Кәсіпорындарға 17,5 миллион теңгенің 67 әкімшілік айыппұлы салынды, – деп мәлім етті Бақытбек Қизатов.
