Шығыс Қазақстан облысында төтенше жағдайлар департаменті мен Апаттар медицинасы орталығы қызметкерлері жаңа техникалар мен заманауи құрал-жабдықтарға ие болды. Бұл жаңа жабдықтар құтқарушыларға қиын ауа райында қауіпсіз әрі ыңғайлы жұмыс істеуге мүмкіндік береді, деп хабарлайды F16.kz.
ТЖМ Апаттар медицинасы орталығының дәрігерлері жаңа, өтімділігі жоғары арнайы автокөлікпен қамтамасыз етілді. Жаңа техника кілтін департамент бастығы Рашид Блялов табыстап, оның басты артықшылығы – азаматтарды құтқару кезінде жедел әрекет ету және оқиға орнына жету уақытын қысқарту екенін атап өтті.
Бөлімшелердің материалдық-техникалық базасын күшейту қызметкерлерге тиімді жұмыс істеуге жағдай жасап қана қоймай, адамдардың қауіпсіздігін қамтамасыз етуге де тікелей ықпал етеді. Мұндай жаңартулар төтенше жағдайларға жедел және сапалы әрекет етуге мүмкіндік береді, сонымен қатар құтқарушылардың қызмет сапасын жаңа деңгейге көтереді.
