Қазақстанның ең үздік бес туристік ауылы анықталды. Олардың қатарында Шығыс Қазақстанның екі ауылы бар, деп хабарлайды F16.kz сайты.
«Kazakh Tourism» ұлттық компаниясы жыл сайын өткізілетін «Үздік туристік ауыл» республикалық байқауының 2026 жылғы жеңімпаздарын жариялады. Биылғы үздік бес туристік ауылдың қатарына Шығыс Қазақстан облысынан бірден екі ауыл еніп отыр.
Байқау қорытындысы бойынша жеңімпаз атанған ауылдар:
— Басши ауылы (Жетісу облысы, Кербұлақ ауданы);
— Торайғыр ауылы (Павлодар облысы, Баянауыл ауданы);
— Берел ауылы (Шығыс Қазақстан облысы, Катонқарағай ауданы);
— Коробиха ауылы (Шығыс Қазақстан облысы, Катонқарағай ауданы);
— Имантау ауылы (Солтүстік Қазақстан облысы, Айыртау ауданы).
Аталған байқау ауылдық туризмді дамытуға, өңірлердің туристік әлеуетін арттыруға және табиғи, тарихи әрі мәдени ерекшеліктері бар елді мекендерді қолдауға бағытталған.
Шығыс Қазақстан облысы бұл жолы ерекше нәтижеге қол жеткізді. Өйткені республика бойынша үздік деп танылған бес ауылдың екеуі Катонқарағай ауданынан таңдалды. Берел ауылы әлемге әйгілі Берел қорғандарымен және сақ дәуірінің бірегей тарихи мұрасымен танымал болса, Коробиха ауылы өзінің көркем табиғатымен, экологиялық туризмге қолайлы мүмкіндіктерімен және дәстүрлі ауыл өмірінің ерекшеліктерімен туристерді қызықтырады.
Сарапшылардың пікірінше, бұл жетістік Катонқарағай өңірінің туристік тартымдылығының артып келе жатқанын және оның Қазақстандағы ең перспективалы туристік бағыттардың бірі екенін тағы бір мәрте дәлелдейді.
