Былтырғы 1 тамыз бен 30 қараша аралағында алғашқы медициналық-санитариялық көмек көрсететін ұйымдар арасында республикалық «МСАК көшбасшысы» байқауы өтті. Байқауды Әлеуметтік медициналық сақтандыру қорының филиалдары ұйымдастырды, деп хабарлайды F16.kz порталы облыстың денсаулық сақтау басқармасына сілтеме жасап.
Қор өкілдерінің айтуынша, байқау барысында емханалар бірнеше негізгі көрсеткіш бойынша бағаланды. Атап айтқанда, халықты міндетті әлеуметтік медициналық сақтандыру (МӘМС) жүйесіне қамту деңгейін арттыру, емделушілер шағымының азаюы, тіркелген халық арасында МӘМС жүйесі мен емделушілерге қызмет көрсету орталығы жұмысына қатысты сауалнама нәтижесі, динамикалық бақылаудағы науқастар арасында шұғыл емханаға жатқызу деңгейін төмендету, БАҚ пен әлеуметтік желілер арқылы МӘМС принциптері мен артықшылықтары, сондай-ақ жарна мен аударымдарды төлеу тәртібі туралы ақпараттық жұмысты белсенді жүргізу.
Байқау нәтижесінде Шығыс Қазақстан облысының келесі медицина ұйымдары жүлделі болды:
1-орын – «Ем алу плюс» ЖШС
2-орын – Өскемен қаласының №1 емханасы
3-орын – Катонқарағай аудандық ауруханасы
Әлеуметтік медициналық сақтандыру қоры облыстық филиалының директоры Данияр Исеновтің айтуынша, байқау алғашқы медициналық-санитариялық көмек көрсету қызметін дамытудағы маңызды құралға айналды.
Алғашқы медициналық-санитариялық көмек – бүкіл денсаулық сақтау жүйесінің негізі. Міне осы деңгейде адамдардың сенімі қалыптасады, аурудың алдын алу, оны ерте анықтау және созылмалы ауруларды бақылау бойынша көптеген мәселелер шешіледі. «МСАК көшбасшысы» байқауы тек үздіктерді анықтап қоймай, медициналық ұйымдарды қызмет сапасын арттыруға, халықпен жұмысты жақсартуға және азаматтарды МӘМС жүйесіне белсенді тартуға ынталандырады, – деді Данияр Исенов.
