Өскемен экономика және техника колледжінде «Заң және жастар» атты диалог алаңы өтті. «Заң және тәртіп» идеологемасы аясында ұйымдастырылған іс-шараның мақсаты – жастардың құқықтық мәдениетін арттыру, азаматтық ұстанымын нығайту және жауапты мінез-құлық қалыптастыру, деп хабарлайды F16.kz.
Кездесу спикері – Шығыс Қазақстан облысының полиция департаменті Қоғамдық қауіпсіздік басқармасының аға инспекторы, полиция капитаны А.Төкенова. Ол қатысушыларға әкімшілік және қылмыстық құқықбұзушылықтардың салдары туралы жан-жақты түсіндіріп, кәмелетке толмағандар арасындағы құқықбұзушылық мәселелеріне ерекше назар аударды. Сондай-ақ нашақорлықтың алдын алу, «дроперлік», интернет-алаяқтық және басқа да заманауи қауіп-қатерлер жайында ақпарат берді.
Студенттерге құқық қорғау органдарының жұмыс механизмі, заңсыз әрекеттер үшін жауапкершілік шаралары, интернет кеңістігінде ұстанатын қауіпсіздік ережелері туралы айтты. Жастар жеке және цифрлық қауіпсіздікке қатысты, сонымен қатар есірткі таратуға немесе заңсыз схемаларға тартудың алдын алу мәселелеріне байланысты барлық сұрақтарға жауап алды.
Диалог алаңының жұмысы жастардың құқықтық, қаржылық және цифрлық сауатын арттыруға, заңға деген құрметті нығайтуға, заңға қайшы әрекеттерге қарсы иммунитет қалыптастыруға және цифрлық дәуір жағдайында сыни ойлау қабілетін дамытуға ықпал етті.
