Шығыс Қазақстан облысында «Таза Қазақстан – жастар таңдауы» атты ақпараттық-түсіндіру кездесуі өтті. Іс-шара республикалық «Таза Қазақстан» экологиялық бастамасы аясында ұйымдастырылды, деп хабарлайды F16.kz.
Кездесу барысында жастарға экологиялық мәдениет, жеке жауапкершілік және экологиялық қауіпсіз қоғам қалыптастыру жөнінде ақпарат берілді. Ашық пікір алмасу алаңында қоршаған ортаны қорғау тек формалды міндет емес, жаңа буынның саналы таңдауы екені айтылды. Жиында «Таза Қазақстан» бастамасының негізгі бағыттары таныстырылып, экологиялық қауіпсіздік, тұрмыстық қалдықтарды ұтымды басқару, сондай-ақ өңірде экологиялық волонтерлікті дамыту мәселелері талқыланды.
«Таза Қазақстан» – бір реттік акция емес. Бұл – жүйелі жұмыс пен жаңа экологиялық философия. Ал бүгінгі жастар – ертеңгі күннің мәдениетін қалыптастыратын буын. Олардың саналы әрекеті, бастамашылдығы мен азаматтық ұстанымы өңірдің, еліміздің болашағын айқындайды, – деді «Қоғамдық экологиялық даму орталығы» ҚБ жетекшісі, эколог Ясса Танир.
Кездесу мазмұнды әрі еркін пікір алмасу форматында өтіп, қатысушыларды «тазалық жеке таңдаудан басталады» деген ортақ идея төңірегінде біріктірді. Шығыс Қазақстан облысының жастары бұл таңдауды бүгіннен бастап жүзеге асырып келеді.
