Бүгін – Автожол саласы қызметкерлерінің күні. Бұл кәсіби мереке елімізде жыл сайын қазан айының соңғы жексенбісі атап өтіледі. Игі дәстүр биыл да өз жалғасын тапты. Сала мамандары Шығыс Қазақстан облысы әкімінің алғыс хаттарымен марапатталды, деп хабарлайды F16.kz.
Шығыс Қазақстан облысының жолшылары еліміздің көлік инфрақұрылымын дамытуға зор үлес қосып келеді. Олардың қажырлы еңбегінің арқасында Бұқтырма су қоймасы арқылы өтетін елдегі ең ұзын әрі құрылысы күрделі Күршім көпірі салынды, Омбы–Майқапшағай автожолы заманға сай қалпына келтіріліп, ондаған көпір жөнделді. Көлік қатынасын жақсартқан мұндай жобалар өңірдің тұрақты дамуының символына айналды.
Өңірде жыл сайын 500 шақырымнан астам жолға орташа жөндеу жүргізіледі. Шалғай ауылдардың өмірі асфальт көрмеген жолдары жаңғыртылып жатыр.
Кәсіби мерекеге орай саланың үздік қызметкерлеріне облыс әкімі мен жолаушы көлігі және автомобиль жолдары басқармасының басшысы атынан алғыс хаттар табыс етілді.
Құрметке бөленіп, марапат алғандар сапында өңірдің жол инфрақұрылымын дамытуға және қауіпсіздігін қамтамасыз етуге елеулі үлес қосқан мердігер компаниялардың, көрсетуші ұйымдардың өкілдері бар.
Бұл мереке еңбегімен жүздеген мың тұрғынның жайлылығы мен қауіпсіздігін қамтамасыз етіп жүрген жандарға деген ризашылық пен құрметтің белгісіне айналғанын атап өткен жөн.
