С. Аманжолов атындағы ШҚУ-да білім беру саласы өкілдерімен маңызды кездесу ұйымдастырылды. Оқытушылар қауымына Жаңа Конституция жобасының негізгі бағыттары мен басымдықтары кеңінен түсіндірілді. Кездесуге білім беру саласының өкілдері, коалиция мүшелері қатысып, ел дамуы үшін қолға алынған конституциялық реформалардың мәні мен маңызын талқылады, деп хабарлайды F16.kz.
Аталған басқосу жаңа Конституция жобасын халық арасында кеңінен насихаттауға және оның мазмұнын терең түсіндіруге бағытталды. Жиын барысында коалиция мүшесі Мұхтар Төлеген жаңа Конституцияда айқындалған негізгі басымдықтарға тоқталды.
Оның айтуынша, ұсынылып отырған конституциялық өзгерістердің басты мақсаты – әділетті, құқықтық және әлеуметтік мемлекет құру. – Жаңа Конституция жобасында адам және азамат құқықтары мен бостандықтарын қорғау бірінші орынға қойылған. Мемлекеттік биліктің халық алдындағы жауапкершілігін арттыру, заң үстемдігін күшейту – басты міндеттердің бірі. Бұл өзгерістер қоғамдағы сенімді нығайтып, елдің тұрақты дамуына жол ашады, – деді Мұхтар Төлеген.
Сонымен қатар, ол білім беру саласының қоғам дамуындағы рөліне ерекше тоқталды. Жаңа Конституцияда педагогтердің мәртебесін көтеру, академиялық еркіндікті кеңейту және жастарға сапалы білім алуға тең мүмкіндік жасау мәселелері нақты көрініс тапқанын атап өтті.
