Шығыс Қазақстанда шомылу маусымы басталғалы 6 адам суға батып кетті. Ал, құтқарушылар бұл маусымда 13 адамды ажалдан арашалап қалған, деп хабарлайды F16.kz.
ШҚО ТЖД бастығының орынбасары Исхар Савазовтың айтуынша, қайғылы жағдайдың барлығы жабдықталмаған жағажайларда болған.
Демалушылар көбінесе өз күштеріне сеніп, ағысқа қарсы жүзеді немесе тереңге кетіп қалады. Осындай қайғылы жағдайлардың алдын алу мақсатында еріктілермен және жергілікті атқарушы органдармен бірлесіп тұрақты негізде профилактикалық акциялар мен іс-шаралар өткізіп отырамыз. Қазіргі күні 1320-дан астам рейд жүргізіліп, су айдындарында жүріс-тұрыс ережелері түсіндірілді, — дейді ол.
Жаз мезгілінің басынан бастап патрульдеу барысында құтқарушылар 13 адамға көмекке келіп, аман алып қалған. Сондай-ақ ҚР ӘҚБтК 412-бабы бойынша су айындарындағы қауіпсіздікті сақтамаған 32 адам әкімшілік жауапкершілікке тартылды.
Осы ретте құтқарушылар азаматтардан қауіпсіздік талаптарын қатаң сақтауға шақырады.
