Қазіргі таңда Таиландтың Накхонратчасима қаласында өтіп жатқан 18 жасқа дейінгі қыздар арасындағы Азия чемпионатында Қазақстан құрамасының сапында Шығыс Қазақстан облысының волейбол мектебінің түлектері мен мамандары ел намысын абыроймен қорғап жүр, деп хабарлайды F16.kz сайты.
Ұлттық құраманың бас бапкері Владимир Аниконов, бапкердің көмекшісі Эдуард Нааб, дене даярлығы бойынша бапкер Александр Титоренко, аналитик-бапкер Ерасыл Нуралин және құраманың баспасөз қызметінің өкілі Ислам Мұхамедуалиев – барлығы да Шығыс Қазақстан волейболының қалыптасуына үлес қосқан мамандар.
Ал алаңда ел намысын қорғап жүрген капитан Маргарита Вагнер, Азия Оралбаева, Айханым Тиянақова және Еркежан Кассаинова — Шығыс Қазақстанның волейбол мектебінде тәрбиеленген талантты спортшылар.
Бұл — Шығыс Қазақстандағы волейбол жүйесінің жоғары деңгейде жұмыс істейтінінің айқын дәлелі. Жылдар бойы қалыптасқан дәстүр, білікті бапкерлердің еңбегі, жүйелі дайындық пен спортқа деген жанашырлық бүгінде өз жемісін беріп отыр. Облыс волейбол мектебі Қазақстан құрамасына үздік ойыншыларды ғана емес, жоғары білікті жаттықтырушылар мен мамандарды да тұрақты түрде дайындап келеді.
Шығыс Қазақстанның волейбол мектебі — еліміздегі ең мықты мектептердің бірі. Оның түлектері Қазақстанның намысын халықаралық аренада абыроймен қорғап, өңір спортының беделін асқақтатуда.
Шығыс Қазақстан — чемпиондарды тәрбиелейтін өлке. Оның волейболдағы даңқты дәстүрі әлі талай жарқын жеңістермен жалғасын табатыны сөзсіз.
