Шығыс Қазақстан облысында экономика және денсаулық сақтау салаларындағы халықаралық әріптестікті дамыту бағытындағы жұмыстар жүйелі түрде жалғасып келеді. Осы орайда бүгін облыс әкімі Нұрымбет Сақтағанов Австрия Республикасының Қазақстандағы Төтенше және Өкілетті елшісі Андреа Бахермен кездесті, деп хабарлайды F16.kz.
Кездесу барысында екіжақты ынтымақтастық аясындағы инвестициялық жобаларды іске асыру мүмкіндіктері талқыланды. Әсіресе, медициналық оңалту саласындағы жобаларға ерекше назар аударылды. Сол бастамалардың бірі – австриялық медицина мен басқарудың озық стандарттарын қолдана отырып, заманауи оңалту орталығын құру жобасы.
Халықаралық тәжірибе енгізіледі
Айта кету керек, бұған дейін Шығыс Қазақстан облысының әкімдігі мен SANLAS Holding GmbH компаниясы арасында ынтымақтастық туралы меморандумға қол қойылған. Бұл құжат медициналық оңалту, денсаулық сақтау, ғылыми зерттеулер және кәсіби білім беру бағыттарындағы бірлескен жобаларды дамытуға негіз болады.
Облыс әкімі Нұрымбет Сақтағанов Шығыс Қазақстанға инвестиция тарту ғана емес, тұрғындардың өмір сапасын арттыру да маңызды екенін атап өтті. Оның айтуынша, аймақ медицина инфрақұрылымын дамытуға және оңалту қызметтерін жетілдіруге бағытталған халықаралық үздік тәжірибелерді енгізуге мүдделі.
Жалпы, Қазақстан мен Австрия арасында сауда-экономикалық ынтымақтастық тұрақты дамып келеді. Былтырғы сегіз айдың қорытындысы бойынша екі ел арасындағы тауар айналымы 189,4 миллион АҚШ долларына тең болған.
Қазақстан Еуропаға қандай тауарлар экспорттайды?
Қазақстан Австрияға тантал және одан жасалған бұйымдар, балық өнімдері, бериллий, хром, германий, ванадий, галлий секілді сирек металдар, сондай-ақ зығыр тұқымы, навигациялық құралдар және басқа да тауарлар экспорттайды. Ал Австриядан Қазақстанға вакциналар мен дәрілік препараттар, минералды сулар, ортопедиялық бұйымдар мен протездер, автотехника, құрылыс және тамақ өнеркәсібіне арналған өнімдер импортталады.
Кездесу барысында Шығыс Қазақстан облысының әкімі денсаулық сақтау, жоғары технологиялар және өнеркәсіптік кооперация салаларында австриялық серіктестермен ынтымақтастықты одан әрі кеңейтуге дайын екенін жеткізді. Өз кезегінде Андреа Бахер жылы қабылдау үшін алғыс айтып, өңірдің табиғатының ерекше көркемдігін атап өтті.
