Шығыс Қазақстан облысында экотуризм, тау-шаңғы және қалалық демалыс бағыттарын біріктіретін төрт ірі кластерді дамытып, инфрақұрылымды жаңарту жұмыстары қарқынды жүріп жатыр. Жаңа әуежайлар мен халықаралық деңгейдегі қонақүйлер салу жобалары аймақтың туристік әлеуетін айтарлықтай арттырады. Бұл туралы ШҚО әкімі Нұрымбет Сақтағанов ОКҚ алаңында өткен баспасөз мәслихатында мәлім етті, деп хабарлайды F16.kz.
Аймақ басшысының айтуынша, Катонқарағай ауданында – wellness-туризм, Марқакөлде экотуризм, Риддерде тау-шаңғы, ал Өскемен мен оған жақын аудандарда демалыс күнгі туризмі даму үстінде.
Қардың мол түсуі және қыстың ұзақтығы тау-шаңғы саласын дамытуға өте қолайлы. Риддер маңында жыл бойы жұмыс істейтін «Анатау» кешенін салу жоспарда бар. Бұл нысан тау туризмінің орталығына әрі спортшылар дайындық базасына айналады. Сонымен қатар «Pana Asia» компаниясы өңірде халықаралық стандартқа сай жаңа қонақүйлер желісін ашуға кірісті, – деді өңір басшысы.
Сонымен қатар «AltaiFest» және «Шығыс Салбурыны-2025» секілді ірі мәдени шаралар да туристер ағынын арттыруға ықпал етіп отыр. Биылғы этнофестивальге еліміздің барлық өңірінен және Ресей, Қытай, Испания, Венгрия, Моңғолия, Қырғызстаннан келген 148 бүркітші қатысып, 10 мыңнан астам көрермен жиналды.
Облыс әкімінің айтуынша, саланы дамыту үшін заманауи инфрақұрылым шешуші рөл атқарады. Өңірде көлік, коммуналдық және энергетикалық жүйелер кезең-кезеңімен жаңартылып жатыр. Президент тапсырмасына сәйкес, биыл екі жаңа әуежайдың құрылысы жүріп жатыр. Сонымен бірге «Майқапшағай» және «Уба» өткізу бекеттері мен бес теміржол вокзалы жаңғыртылып жатыр.
Былтырдан бастап Өскеменнен Мәскеу мен Новосібірге халықаралық рейстер ашылды. Келер жылы Қытайға тікелей әуе қатынасын іске қосу жоспарда бар. Сондай-ақ Өскемен – Алматы бағытында жүретін тальго пойызына дайындық жүріп жатыр.
