Бүгін аймақ басшысы Нұрымбет Сақтағанов облыстық мәслихаттың кезекті сессиясында депутаттар алдында есеп беріп, өңірдің әлеуметтік-экономикалық даму көрсеткіштері мен негізгі бағыттар бойынша атқарылып жатқан жұмыстар туралы баяндады, деп хабарлайды F16.kz.
Жиында өнеркәсіп саласындағы ахуалға назар аударылды. Облыс әкімінің айтуынша, ірі кәсіпорындардағы өндіріс көлемінің төмендеуі кейбір көрсеткіштердің тиісті деңгейде болмауына әсер еткен.
Сонымен қатар өңірде инвестициялық белсенділікті арттыруға ерекше көңіл бөлініп отыр. Қазір жалпы құны 1,5 трлн теңге болатын, 10 мыңнан астам жаңа жұмыс орнын ашуға мүмкіндік беретін 101 инвестициялық жоба жүзеге асырылып жатыр. Жоспарға сәйкес, былтыр сегіз ірі жоба іске қосылса, биыл тағы 27 жобаны пайдалануға береміз. Бұл жобалардың қатарында өнеркәсіп өндірістерін жаңғырту, жаңадан қайта өңдеу кәсіпорындарын салу бастамалары бар, — деді аймақ басшысы.
Облыс әкімі атап өткен жобалар Шығыс Қазақстанның экономикалық әлеуетін арттырып, жаңа жұмыс орындарын құруға және өндіріс құрылымын әртараптандыруға ықпал етпек.
Өңірде 2026-2030 жылдарға арналған даму жоспары аясында экономиканы әртараптандыру, қайта өңдеу өнеркәсібін, туризмді және цифрлық шешімдерді дамытуға басымдық берілген жаңа міндеттер жүзеге асырылып келеді. Ревизиялық комиссияның бағалауынша, өңірде инвестициялық белсенділіктің артуы мен тұрақты даму қарқыны байқалады.
