Шығыс Қазақстан облысында 52,8 мың гектар ауыл шаруашылығы жері мемлекет меншігіне қайтарылды, деп хабарлайды F16.kz.
Ауыл шаруашылығы министрлігінің ақпаратына сенсек, 2025 жылдың бірінші жартыжылдығында Шығыс Қазақстанда ауыл шаруашылығы мақсатындағы жерлерді мемлекеттік жер қорына қайтару жоспары артығымен орындалған.
– Жоспар бойынша 51,57 мың гектар жер қайтарылуға тиіс болса, нақтысында 52,8 мың гектар пайдаланылмай жатқан ауыл шаруашылығы жері мемлекет меншігіне өткен. Бұл – жоспардың 102,4 пайызға орындалғанын көрсетеді, – деп жазады министрліктің баспасөз қызметі.
Жалпы, 2025 жылға өңір үшін 120 мың гектар жерді қайтару жөнінде нысаналы көрсеткіш белгіленген. Бұл жұмыс жер ресурстарын тиімді пайдалану және пайдаланылмай жатқан немесе тиімсіз пайдаланылып жатқан ауыл шаруашылығы алқаптарының көлемін азайтуға бағытталған мемлекеттік саясат аясында жүргізіліп жатыр.
Жерлерді қайтару жөніндегі жұмысты аудандық әкімдіктермен және уәкілетті органдармен бірлесіп ҚР Ауыл шаруашылығы министрлігіне қарасты ШҚО Жер ресурстарын басқару департаменті үйлестіреді.
