Шығыс Қазақстан облысында «Әділетті және Прогрессивті Қазақстанның Халықтық Конституциясы үшін!» атты өңірлік коалиция өз жұмысын бастады. Бұл бастама қоғамның әртүрлі өкілдерін ортақ мақсатқа біріктіруді көздейді. Коалиция құрамына бес саяси партияның мүшелері мен түрлі қоғамдық ұйымдардың өкілдері кірген. Жалпы саны – 322 адам, деп хабарлайды F16.kz.
Бүгін коалицияның алғашқы отырысы өтті. Жиынға саяси партиялар, үкіметтік емес ұйымдар, сарапшылар мен белсенді азаматтар қатысты. Кездесуде Жаңа Конституция жобасы талқыланып, ондағы негізгі өзгерістер сөз болды. Қатысушылар бұл құжаттың саяси реформаларды жалғастыруға, мемлекеттік басқару жүйесін жетілдіруге және билік тармақтарының тепе-теңдігін нығайтуға бағытталғанын айтты.
Жиынды ашқан өңірлік коалиция жетекшісі Денис Рыпаков алдағы жоспарлармен бөлісті. Оның айтуынша, басты міндет – халыққа Конституция жобасының мазмұнын кеңінен түсіндіру.
Біз тұрғындарға құжаттағы негізгі өзгерістерді қарапайым әрі түсінікті тілмен жеткіземіз. Түсіндіру жұмыстары ашық өтеді. Халықтың ұсыныс-пікірлері жинақталып, талқылауға енгізіледі. Алдағы уақытта коалиция мүшелері облыстың барлық аудан-қалаларын аралап, кездесулер өткізеді, – деді ол.
Ал коалиция мүшесі, Amanat партиясы Шығыс Қазақстан облыстық филиалы төрағасының міндетін атқарушы Аманбай Нұркенов жобадағы басты жаңалықтарға тоқталды.
Жаңа Конституция – еліміздегі саяси реформалардың жалғасы. Құжатта егемендік, тәуелсіздік, аумақтық тұтастық пен мемлекеттік шекара басты құндылық ретінде нақты көрсетілген. Сондай-ақ еліміздің мыңжылдық тарихы ұлттық құндылық ретінде айқындалған. Енді осы өзгерістерді халыққа жан-жақты түсіндіруіміз керек, – деді ол.
Жиында Конституция жобасын талқылау ашық әрі жария түрде өтетіні айтылды. Алдағы бір айда коалиция мүшелері облыс бойынша 970-тен астам іс-шара өткізуді жоспарлап отыр. Кездесулер еңбек ұжымдары, жастар, ардагерлер және үкіметтік емес ұйымдар арасында ұйымдастырылады.
