Шығыс Қазақстан облысында Ұлы Отан соғысының небары алты ардагері қалды. Ғасыр жасаған майдангерлермен әрбір кездесу – ел тарихының тірі куәгерлерімен жүздесудің айрықша сәті. Олардың өшпес ерлігі мен өнегелі өмір жолы кейінгі ұрпаққа үлгі болып қала береді. Жеңіс күні қарсаңында облыс әкімдігінің өкілдері қарт жауынгерлерді арнайы құттықтады.
Биыл майдангер Макар Харин 100 жасқа толады. Ол соғыс жылдары Ленинград және Балтық майдандарында минометші болып қызмет атқарып, соғыс кезінде жараланған. Қазір ардагер Өскемен қаласында тұрып жатыр.
Павел Стрехо жуырда ғасырлық мерейтойын атап өтті. Соғыс кезінде Беларусь майданында автоматшы болып, Кёнигсберг үшін шайқастарға қатысқан. Жеңіс күнін де сол қалада қарсы алған ардагер III дәрежелі Даңқ орденімен, I дәрежелі Отан соғысы орденімен, «Ерлігі үшін», «Кёнигсбергті алғаны үшін», «Германияны жеңгені үшін» медальдарымен және маршал Жуков медалімен марапатталған. Қазір ол Глубокое ауданында ұлымен бірге тұрады.
Ғасыр жасаған тағы бір майдангер – Александра Саратовцева. Соғыс жылдары ол құрылыс бригадасының құрамында көпір салу жұмысына қатысып, Жеңіс күнін Польшаның Новы-Сонч қаласында қарсы алған. Ардагер II дәрежелі Отан соғысы орденімен, «Сталинградты азат еткені үшін» және «Германияны жеңгені үшін» медальдарымен наградталған.
Бүгінде 103 жасқа келген Анастасия Светочева қоршаудағы Ленинградта әуе шабуылына қарсы қорғаныс бөлімдерінде қызмет еткен. Ол бомбалау салдарын жоюға және жараланғандарға көмек көрсетуге атсалысқан. Майдангер II дәрежелі Отан соғысы орденімен марапатталған. Қазір ардагер облыс орталығында өмір сүріп жатыр.
Михаил Головатюк 1943 жылы еңбек армиясына шақырылып, Иркутск-Байкал теміржолының құрылысына қатысқан. Кейін 579-атқыштар полкінде автоматшы ретінде қызмет етіп, Жапонияға қарсы шайқастарға қатысқан. Ол II дәрежелі Отан соғысы орденімен, «Жапонияны жеңгені үшін» медалімен және Ленин орденімен марапатталған.
Майданға небары 18 жасында аттанған Иван Шевцов Польша мен Чехословакияны азат ету жолындағы шайқастарға қатысқан. Ардагер II дәрежелі Отан соғысы орденімен, Қызыл Жұлдыз орденімен және «Ерен еңбегі үшін» медалімен наградталған.
Мереке қарсаңында облыс әкімдігі өкілдері майдангерлер мен тыл еңбеккерлерінің шаңырағына арнайы барып, құрмет көрсетті.
Соғыс ардагерлерінің жанқиярлық ерлігі мен Отан алдындағы адал қызметі – бүгінгі ұрпақ үшін ерлік пен отансүйгіштіктің жарқын үлгісі. Олардың есімі мен еңбегі халық жадында мәңгі сақталады.
