Алдағы 9-11 қазан аралығында Ұлан ауданының Бозанбай ауылында «Шығыс салбурыны-2025» V мерейтойлық халықаралық фестивалі өтеді, деп хабарлайды F16.kz.
Айтулы шара Шығыс Қазақстан облысы әкімдігі, Туризм және спорт министрлігі, «Sport Qory» қоры және «Республикалық құсбегілер Федерациясы» қоғамдық бірлестігінің қолдауымен өтеді.
Биылғы фестивальге еліміздің әр өңірінен және Моңғолия, Венгрия, Қырғызстан және басқа да елдерден қонақтар қатысады.
Фестиваль бағдарламасы:
8 қазан – қатысушыларды тіркеу, мандаттық комиссия, жеребе тарту;
9 қазан – салтанатты ашылу, ұлттық киімдер шеруі, көрме;
10 қазан – жарақтар көрмесі, құстармен (бүркіт, қаршыға, ителгі) өнер көрсету, тазы иттермен аңшылық;
11 қазан – финалдық жарыстар, марапаттау рәсімі, фольклорлық ансамбльдер мен танымал әртістердің қатысуымен гала-концерт.
«Бүркіт төбе» этноалаңында 20-дан астам киіз үй тігіліп, шеберлік сабақтары, қолөнер көрмелері және дәстүрлі қазақ салт-дәстүрлері көрсетіледі: «Ашамайға мінгізу», «Беташар», «Тұсау кесу», «Қырқынан шығару», «Бесікке бөлеу», «Сырға салу» және т.б.
Құрметті қонақтар қатарында Туризм және спорт министрлігінің мемлекеттік жаттықтырушысы Базарбек Күнтуған, Республикалық құсбегілер федерациясының вице-президенті Бағдатхан Мүптекеқызы, сондай-ақ әлемге танымал бүркітші Айшолпан Нұрғайып, Халықаралық этномәдени ұйымдардың өкілдері бар.
11 қазанда Өскемен-Бозанбай-Бәйгетөбе бағытында арнайы автобус маршруты ұйымдастырылады. Автобус Өскемендегі «ADAL» автобекетінен сағат 8.00-де, ал кері бағытта сағат 16.00-де шығады.
Жолда автобус «Эмилия», «Өзен вокзалы», «Фреш маркет», «Сәтбаев», «Сол жағалау полиция бөлімі (жатақхана)», «20-шағынаудан» аялдамаларына тоқтайды.
